عدد الرسائل : 650 العمر : 46 الموقع : https://nrjsia.yoo7.com المزاج : رايق تاريخ التسجيل : 18/08/2007
موضوع: رحلة الى سيرالانكا الأربعاء أكتوبر 31, 2007 12:39 am
رحت خمس ايام ومقسم الرحله على 5 اجزاء ليه السبب بسيط هذي رحله لمدينه وحده فيها حوالي 100 صور من غير الفيدو لو حطيت الرحله في جزء واحد بتصير الصور اكثر من 300 صوره مين عنده استعداد يفتح ايميل فيه 300؟
روحوا صلحوا شاهي وتعالوا ترى الايميل طويل
قبل نطلع من حدود مدينة كاندي كان فيه مطر خفيف والجو روعه والهوا منعش>>>سفن اب ماهوب هوا كانت الساعه تقريبا 12 الظهر نوراليا تقع جنوب كاندي تقريبا بعد فتره بدأ الطريق بالارتفاع التدريجي والطريق كثرت فيه المنحنيات والجو يبرد اكثر
الطريق كان شبه خالي لكن كانت منحنياته كثيره بس مانوقف الا للقطارات واكثر شي عندهم القطارات كل ربع ساعه نوقف عند سكة قطار وننتظر لين يمر القطار قطارهم يمشي 40 بعض الركاب ينزل من العربه اللي ورى ويركض ويكلم سواق القطار يقوله وقف عشان ينزل طيب دام نزلت ليه تكلمه روح بيتكم
عادي القطار يمر بين البيوت والورعان يلعبون واللي يتعلق يتعلق
هذا القطار شوفوا الكبينه مافيها احد السواق نزل من القطار وهو يمشي راح يشتري دخان وبعدين يلحق القطار
اكثر القطارات مافيه شبابيك ولا ابواب اللي يبي يركب يركب واللي يبي ينزل ينزل الظاهر انه سبيل
واصلنا رحلتنا وكانت الامطار تزيد كل ما ارتفعنا السواق يقول ان شاء الله الجو يكون حلو بنوراليا ولايكون فيه مطر وحنا طبعا نبي العكس نقوله ان شاء الله مطر قال اذا فيه امطار بتكون الشلالات كثيره
كنا نشوف طلبة المدارس يمشون مع بعض بنات واولاد لانه وقت خروجهم المدارس
كان الكل يمشي على الطريق
كثير من الشاحنات محمله اشجار يقطعونه ويرسلونه للمصانع
بدينا نشوف مزارع الشاي لان الشاي ماينبت الا بالجبال
بعد فتره قفلنا شابيبك السياره لان الجو بااااارد
مزارع الشاي
وقفنا نتفرج على المزارع والمناظر الجميله
وفجأه طلعت لنا ام الشباب طلعت هالعجوز من بين الاشجار اول ماشفتها دفيتها وقعدت تدحرج لين وصلت تحت والسواق يطالع لي وعيونه كذا قال وشفيييييييييك على المره قلت ياخي ماتشوف النقطه الحمرا اللي على جبهتها قال الا اشوفها قلت هذا واحد مصوب عليها بندق ليزر بيذبحها وانا انقذتها قال اي ليزر انت وراسك هذولي هندوس هم اللي يحطون النقطه زي الهنود قلت عاد وش دراني انا ناوي افزع المهم شوي الا هي طالعه زي الجني مره ثانيه وتضحك بعد الظاهر متعوده على هالحركه
واصلنا طريقنا لين وصلنا شلال صغير ووقفنا عنده
شلال صغير كل ماشفنا شلال قلنا للسواق وقف وكانت الشلالات كثيره وعصب السواق قال انتم اول مره تشوفون شلالات ماعندكم شلالات يعني قلت الا عندي بس مافيه ماء
ابتسامه سيلانيه بريئه والله عاد مدري هي بريئه والا ناوي يسرقنا بس ما امداه
مناظر ولااااا اروع والجو مع انه بااااارد بس حلو
هذا الظاهر مصلى للبوذيين المسافرين
بدت الامطار تهطل بغزاره والضباب يزيد مع ان الساعه 1 الظهر حتى الطريق صار اخطر منعطفات خطيره وامطار غزيره وضباب
هذولي البنات اللي يقطفون اوراق الشاي
مايشتغل بقطف الشاي الا البنات ليه مدري يمكن لان البنت ناعمه تقطف الاوراق اللي فوق والرجال دفوش يسحب الشجره من جذورها
بيوت وسط حقول الشاي
هنا الطريق صار ضيق مره
يزرع في نوراليا الشاي والفراوله بس حقول الشاي اكثر
احد الشلالات طبعا كانت نيتنا زيارة مصنع الشاي عشان نشوف كيف طريقة تصنيعه وكل السواقين يتفقون مع احد المصانع انهم يجبون لهم سياح مقابل وجبة غدا او كوب شاي والسياح اكيد بيشترون من المصنع وهالطريقه موجدوده في اغلب دول شرق اسيا
البنات يحطون على روسهم غطاء نايلون لان المطر بالمنطقه هذي مايوقف ابداااا
وصلنا لواحد من اكبر المصانع في لابوكالي مصنع بلو فيلد
وتعني الحقل الازرق الظاهر راعي المصنع عنده عمى الوان
اول ماوقفنا عند المصنع بدت الامطار تهطل بشكل عجيب
بسرعه دخلنا المصنع وجا معنا واحد وقعد يشرح لنا طريقة صنع الشاي البدايه تكون من المزارع واللي يشتغل فيها البنات يقطفون اوراق الشاي بطرق خاصه ومن العاده يكون عدد البنات اللي يشتغلون بالمزرعه الوحده من 200 الى 300 بنت طبعا يجيبون الشاي بسلال يشيلونها على روسهم
محد مربح شركة لبتون الا هالبنت
ويحطون اوراق الشاي بحاويه مستطيله سعتها طن ويكون فيه مراوح تجفف الشاي من الرطوبه
الشاي اثناء تجفيفه
بعد تجفيف اوراق الشاي ينزل من الطابق الاول الى الطابق الارضي من خلال فتحه بالسقف وينزل على طول وسط مكينه ضخمه لتقطيعه الى قطع صغيره وهرسه
بعد كذا يحطونه في مكينه لفرزه حسب نوعه وحجمه وبعد الفرز ياخذون اوراق الشاي الجيده والباقي يباع على انه سماد
يوضع الشاي هنا لحرقه في فرن درجة حرارته 270 درجه فهرنهايت
هذا الشاي بعد حرقه يطلع من الفرن طبعا كان حار
احس ان ابوسيقان هذا متخصص الشاي الاخضر يمكن عشان الفنيله
بعد كذا يحطونه بمكينه لفرز انواع الشاي الذهبي والاخضر والاسود وغيرها
وهذي انواع الشاي اكثر من 10 انواع
بعدين يحطونه بأكياس كبيره للتصدير لانه شاي خام ويشترونه المصانع اللي تضيف عليه بعض النكهات وتغلفه بأغلفه صغيره مثل شركة لبتون وغيرها
هنا يحملون السماد
بعد هالجوله على المصنع رحنا لمقهى خاص بالمصنع لتذوق الشاي وفيه محل لبيع الشاي والتحف للسياح
مقهى ومطعم مصنع بلو فيلد
قلت لهم ابي اذوق كل انواع الشاي اللي عندكم وصاروا يجيبون من الاكواب ويحطون قدامي وانا اشرب واذا قالوا لي هالنوع يشرب مع الحيب قلت جيبوا لي حليب المهم صارت الاكواب رايحه وجايه هذا حليب وهذا شي اخضر وذهبي واحمر وبالنعناع وبالليمون وقفوا نص عمال المصنع عندي
كانوا يطالعون فيني بعد كل كوب ويقولون هاه طال عمرك عسى جاز لك وانا اقول لااا جيبوا غيره المهم يوم صرت ماعاد اقدر اتحرك من الشاي قلت لهم الشاي الاسود قالو سم طال عمرك كم تبي صندوق قلت اي صندوق ابي باكيت صغير قالوا هااااه بس؟ قلت ايه بس كملت كلمة بس بالشارع طبعا وانا طاير وخويي وراي وقع على شجره وشوي الا السواق من فوقنا يمشي 200 ويطلع لنا واحد قال لعنبو بليسك موقفين المصنع ونص عمالنا يصبون لك شاي وحنا نقول الرجال بياخذ خط انتاج كامل واخرتها علبه صغيره حذفوا علي علبه صغيره وقالوا هذي لك ومانبي منك فلوس قلت طيب عطوني سكر >>>له وجه بعد خويي المسكين مايدري وش السالفه كان بالمحل يتفرج مادرى الا هو بالشارع معي يقول وش السالفه قلت عادي هذي من الطقوس عندهم
الشاي الازرق اللي بالوسط هذا احسن شاي عندهم
انواع الشاي بالفواكه والنعناع وغيرها
يوم شف العلب قلت ماشاء اله تزرعون جراك بعد قال اي جراك هذا شاي فواكه
B.O.P.F اقوى شاي عندهم اسمه B.O.P والشاي الخفيف
ممكن تشتري شاي من خارج المصنع بسعر ارخص لك المصنع يبيع اجود الانواع ولا عندهم شاي مغشوش
خرجنا من المصنع وكملنا رحلتنا الى مدينة نوراليا
ممنوع قطف الشاي اجل وشوله زارعينه
مناظر ولا اروع وخضره على مد البصر
[size=16]
Admin مدير
عدد الرسائل : 650 العمر : 46 الموقع : https://nrjsia.yoo7.com المزاج : رايق تاريخ التسجيل : 18/08/2007
موضوع: رد: رحلة الى سيرالانكا الأربعاء أكتوبر 31, 2007 12:40 am
[/size]
واحد من اكبر الشلالات في نوراليا
لقطة فيديو لاحد الشلالات
المقهى هذا كان يطل على اجمل مناظر نواليا واكبر شلالتها
افضل شاي شربناه كان في المقهى هذا كانوا يصلحون شاي التلقيمه وجلساتهم روعه وش رايكم بالكوب وعلامته اللي كنها دخان ابوبس
بس الامطار حرمتنا من الجلوس مع اني معي مضله بس كان الكرسي مبلول والجو باااااارد
واصلنا رحلتنا وكان السواق يقولنا بوديكم اجمل منظر للشلالات واخيرا وصلنا لها وصلنا الشلال وكان فيه سياح اوروبيين نزلنا مع منحدر وكانت الامطار قوووويه ووصلنا مطعم تحت الشلال وكانت جلسات المطعم راااائعه
الصور من داخل المطعم
لقطة فيديو للشلال
صورت لكم هاللقطات لبعض الاشجار والاغصان
نوراليا 'Little' England'
نوراليا بريطانيا الصغرى كما يطلق عليها ترتفع نوراليا 2000 متر عن سطح البحر وتعتبر المصيف الرئيسي في سيرلنكا وقلب صناعة الشاي واذا شاهدت المنازل في نوراليا والفنادق تعتقد انك في وسط انجلترا بسبب الاستعمار البريطاني لهذه البلده واكتشافهم للشاي حيث كانوا يملكون العديد من مصانع الشاي ولكن بعد ان استقلت سيرلنكا صارت المصانع ملك للدوله تعتبر هذه المدينه من اكبر المدن المصدره للشاي بالعالم يوجد العديد من الاماكن الجميله في نوراليا على سبيل المثال حديقة فيكتوريا وبحيرة جريجوريا تبعد نوراليا 76 كم عن كاندي و180 كم عن العاصمه كولومبو وفيه طريقين للوصول لها طريق كاندي وطريق هاتون وكل الطريقين خطيرين
وقفنا في هالمكان عشان ناخذ صوره لمدينة نوراليا دخلنا مدينة نوراليا في حدود الساعه 3 بعد الظهر وكان حجزنا في فندق جراند وصلنا فندق جراند وهو من مخلفات الاستعمار الانجليزي الفندق اربع نجوم قديم لكنه نظيف وغرفه تطل على مناظر جميله
كانت غرفتنا بالدور الثالث وتطل على حديقة الفندق
يوم وصلنا غرفتنا قالوا هذي الدفايه وهذا اللي يشغلها قلنا مايحتاج نشغلها قال مايحتاج طيب بعد شوي تتصل علي وتقول تعال شغلها وفعلا كان الجو كل شوي يزيد بروده لين وصلت الحراره اقل من 10 درجات
هذي غرفتنا من داخل وتلاحظون الثريه اللي نازله ودي اعرف من الغبي اللي مسوي فيها كذا تصدقون طلعنا من الفندق كل واحد براسه 10 غرز من هالثريه
ارتحنا شوي بالفندق وبعدها طلعنا نستكشف نوراليا على رجلينا طبعا انا معنا مضله ماعندنا مشكله ونصيحه لاي شخص بيسافر لاي بلد لازم يبحث عن اجوائها هل هي بارده ممطره حاره طبعا كان عندنا علم بالجو وجايبين معنا ملابس ثقيله
مقهى تابع للفندق الصراحه انه راااايق خصوصا ان كل جدرانه زجاج وتتفرج على منظر المطر وداخل المقهى فيه دفايه على الطراز الانجليزي
الدوار الوحيد عندهم
حلوه هالدعايه طبعا معلقين سياره وسط اللوحه وهالدعايه فوق معرض سيارات
وصلنا لبوابه حديقة فكتوريا وكنا مترددين ندخل والا ماندخل وحنا واقفين عند شباك التذاكر كان رجال وولد وبنته اشكالهم اوربيين وكانوا مترددين مثلنا يتفرجون على الحديقه من برى ويشاور عياله بس يوم شافونا شرينا تذاكر راحوا واشتروا مثلنا والله بغيت اقهرهم واقطع التذاكر ونمشي بحيره قكتوريا قديمه جدا وعمرها اكثر من 100 عام
حلو منظر الورده طالعه من وسط الما وصايره كأنه منوره
الحديقه جميله وكبيييييره وفيها انواع الاشجار والورود والنوافير وكان في زاوية الحديقه قصر
احد النوافير
هالورده لها سالفه الله لايعيدها
انا كنت سامع ان نوراليا فيها حشره تمص الدم يوم شفت هالورده توقعتها هي وانا اقوم لك عليها وذببببح ودعس وضرب قال خويي وش تسوي قلت هذي الحشره اللي قالوا لنا عليها انتبه وقلت له ابدا من الاشجار اللي على اليمين وانا ببدا من يسار المهم جلسنا 10 دقايق ذبحنا حوالي 20 حشره مادرينا الا الرجال اللي جاي يركض يقول خييييير؟ قلت الحشره قال اي حشره؟؟ قلت هذي ماهي اللي تمص الدم قال دم قال هذي ورده ومن اندر الورود بالحديقه قلت ايه بس تمص الدم صح>>بيرقع قال اقول هالحين تدفع عن كل ورده 50 روبيه طبعا كان الرجال دب والعضلات حتى خشمه فيه عضلات قلت طيب بندفع بس لاتتهور الله يهديك المهم حسبناها وطلعت قيمة اللي ذبحناه من الحشرات>>>للحين مصر انها حشره المهم طلعت حوالي 850 روبيه عطيته عمله من فئة 1000 روبيه قال ماعندي صرف قلت اجل بروح اذبح لي 3 بالباقي قال اقول انثبر بس
وصلنا عند الورده هذي وخويي يقول ماتقول انها هذي الحشره؟ قلت اقول والله هالحين لو اشوف ضب لاقول ورده امش بس طفرنا
حتى هم عندهم نفس حركاتنا يكتوب ذكرياتهم بس ماهو على كباري على الاشجار شوفوا على اليمين ذكريات شباب كولومبو
وصلنا اخر الحديقه وطبعا كانت كبيره كنا ندور باب لان السوق مايفصلنا عنه الا باب بس للاسف مقفل يعني لازم نرجع مع البوابه اللي دخلنا معها والبوابه بعيده اقل شي نص ساعه لين نوصل للسوق قلت بروح ادور مكان نطلع معه رحت ولقيت فتحه بالجدار وتحسفت على التذكره ليتني داري انه فيه فتحه
طلعنا مع الجدار وكان قدامنا سوق عباره عن دورين وجنبه محطه للباصات كان الجو شديد البروده والوقت قبل الغروب بدقايق
ماكان لنا هدف ولا محتاجين شي بس فضول وحب استطلاع دخلنا السوق وكان السوق يتفرع منه اسواق كثيره شعبيه خويي قال ماني داخل روح انت وانا عاد احب الاسواق الشعبيه
دخلت السوق وكان كل الناس يطالعون لي باستغراب لانه ماهو مكان سياحي وانا داخل ومعي كاميراتي واصور كل شي
دخلت سوق الخضار والفواكه وسألتهم عن الموز الاحمر قالوا مافيه منه فيه 3 انواع من الموز في سيرلنكا الاحمر والاصفر والاخضر
دخلت سوق التوابل وجلست ساعه الاربع اعاطس وتعالوا شوفوا انواع الفل ياناس اللي يجينا ماهو فلفل الفلفل عندهم 30 نوع اصلا الفلفل الاحمر عندهم حلى
اسماك مجففه الظاهر هذي المزه حقتهم للناس اللي يدققون بكل شي ترى الريال 30 روبيه
ودخلت بعدها سوق الاسماك واسأل عن الاسعار لا واكاسر بعد قال خويي طيب لو باعوك وانت تكاسرهم قلت عادي اوديه مطبخ الفندق واخليه يسويه لنا
جانب من السوق
والدواعيس كان لها نصيب وهذا اهم شي احب امشي فيها
معروضات السوق تدل على درجة الحراره
اغلب منازل نوراليا وبناياته على الطريقه الانجليزيه بعد غروب الشمس صار البرد شديد والامطار اصلا ماتوقف رجعنا للفندق وتعشينا بمطعم الفندق وكان اكلهم لذيذ بالاضافه الى الحلويات في اليوم التالي غادرنا نوراليا الى العاصمه كولومبو
good man المشرف العام
عدد الرسائل : 303 العمر : 48 المزاج : حسب الجو تاريخ التسجيل : 18/08/2007
موضوع: رد: رحلة الى سيرالانكا السبت نوفمبر 03, 2007 12:54 am
رحلتنا الماضيه كانت عن منطقة دمبولا وكانت دمبولا مرور فقط الى مدينة كاندي الصراحه كان الطريق مليان بنقاط التفتيش وبالحواجز العسكريه كان خويي راكب قدام وانا ورى وكل ماجينا نقطة تفتيش وقفونا ويطلبون اثبات خويي ويكلمون بعضهم شوي وبعدين نمشي صارت معنا يمكن ثلاث مرات وحنا مستغربين منهم لكن بعد كم كيلو وقفونا نقطة تفتيش ونزلونا وقعدوا يحققون معنا انتم من وين وليش جايين وطبعا وريناهم جوازاتنا وبعد التحقيق قلت للسواق اسألهم وش السالفه؟ قال يقولون انهم كانوا يشكون بخويك وانه يشبه واحد من زعماء نمور التاميل قلت لا قلهم خويي من زعماء نمور الثقبه
وش تفتش من كبرها عاد ارفعها بيدك وهزها واذا فيها شي بيطيح
بعد ما افتكينا من الشرطه قلت للسواق وش السالفه قال نمور التاميل خاطفين 3 اشخاص امس والتفتيش شي طبيعي تعودنا عليه بس يزيد اذا صار فيه مشاكل وهاليومين استنفار امني بكل مكان قلت طيب نمور التاميل وين مكانهم قال بالشمال ماهم بعيد قلت طيب خلنا نروح للشمال التفت علي قال انت تتكلم جد قلت ايه قال اذا رحنا اول شي بياخذون سيارتي ويقتلوني قلت طيب وحنا قال انت ماراح يسوون لكم شي قلت طيب يالله مشينا قال وش فيك انت اقولك بياخذون سيارتي ويقتلوني قلت طيب السياره للشركه وانت اذا ذبحوك خذ ارجع بتكسي لاهلك التفت علي ومسك واحد من هالاصنام اللي على الطبلون بيضربني فيه قلت خلاااااااص وش فيك محد يمزح معك انت
وصولنا لكاندي بعد ظهر يوم الاربعاء20-07-2007 وكان حجزنا بفندق ريجنسي ويقع على ضفاف نهر مهاويل كاندي من اكبر المدن السيرلنكيه وهي ثاني اكبر مدينه بعد العاصمه كولمبو وتعتبر عاصمة الثقافه وذلك لكثرة المعابد فيها والمتاحف ترتفع كاندي حوالي 500 متر فوق سطح البحر وتحيط بها الغابات كما يوجد بها العديد من الشلالات والانهار والبحيرات ومن اكبر انهارها نهر مهاويل كان اسم كاندي قديما كاتوبولو نوارا فتغير الى كندايوداراتا>>>اسمها الاول اسهل كندايوداراتا تعني ارض الجبال واليوم تسمى كاندي
صوره اخذتها من قوقل ايرث لوسط مدينة كاندي
كاندي ارض الاثار المخفيه
وصلنا مدينة كاندي بعد الظهر وكان وقت خروج الطلاب من مدارسهم وكنا نشاهد الطلاب بكل مكان باعداد ضخمه عدد المسلمين في كاندي اكثر من باقي المدن والدليل كثرة الطالبات المحجبات والمساجد وفي سيرلنكا لك الخيار بأختيار مدرسه مختلطه او غير مختلطه
احد الاسواق الشعبيه وسط كاندي
سمعت ان كاندي فيها محلات تسوق جميله مقارنة بالمدن الاخرى ومحلات معجبنات وحلويات دخلنا وسط كاندي واسواقها الشعبيه ووقفنا عند محل المعجنات
طبعا تدرون ان هالاقرع خويي والشايب اللي جنبه السواق ان طبعا جالس احرس الكيكه
المحل نظيف وفيه كل شي انواع المعجنات والحلويات اكلنا فيه واخذنا بعض المعجبنات صاحب المحل سيرلنكي اشتغل في دبي وفي الدمام ويتكلم عربي وعرض علي اشتغل معه تصدقون بغيت اوفق قلت اشتغل عنده يومين وبعدها انحاش واصير ابيع بطاقات سوى وامرر مكالمات لاني اشوف البنغاليه عندنا معينين خير من هالسوالف بس قلت ياولد ماتسوى عليك بكره تمسكني جوزات سيرلنكا ويرحلوني لبنغلادش
كاندي بالنسبه للمدن الباقيه كانت اجمل ومنظمه وشوارعها نظيفه وقفنا عند سوبرماركة كبيره ولها مواقف خاصه وبعد ماتسوقنا قلنا للسواق يودينا الفندق
فندق ريجنسي يعتبر افخم الفنادق في مدينة كاندي وكان السعر 90 دولار لشخصين شامل الفطور الفندق على اطراف مدينة كاندي ويقع على نهر مهاويل مباشره وكانت اطلالة الفندق رائعه
الفندق غريب اللوبي والمطعم بمبنى والغرف بمبنى ثاني يعطونك المفتاح ويقولون لك روح دور غرفتك رحنا ندور غرفتنا وتقول بلعبة متاهات تصدقون مالقينا غرفتنا الا ثالث يوم هههههههه
استلمنا غرفتنا و كانت بالدور الرابع كانت الغرفه جميله ونظيفه
وبعد راحه لمدة ساعه نزلنا نتمشى حول الفندق
حمام السباحه الخاص بالفندق والمبنى المقابل المطعم ومدخل الفندق واللوبي
كانت بداية جولتنا من حديقة الفندق كان الفندق محاط بحدائق جميله ومرتبه بعنايه
هذا الممر اللي يوصل من اللوبي والمطاعم الى باقي مرافق الفندق لان هالفندق تصميمه غريب شوي
اخذت لكم هاللقطه الرائعه لاحد الاشجار
الفندق تقريبا مبني على تل وهذي الغابات خلف الفندق مباشره
غابات على مد البصر في كاندي كان الجو رااائع مع بعض الرطوبه لكن البرودة المنعشه تخليك ماتحس برطوبة الجو
تكثر الجبال والغابات في كاندي
جسر فوق نهر مهاويل يوصل للفندق والضفه الاخرى من كاندي
وصلنا لنهر مهاويل وصرنا نمشي بمحاذات النهر
كانت المياه بالنهر قليله
كنا نشوف من بعيد ناس يتسبحون بالنهر
فالينها الشباب وتسبح وشمبو
كنيسه تطل على النهر لاحظوا مكتوب على الكنيسه اسم فاطمه
تكثر الغربان والكلاب اعزكم الله في سيرلنكا وباعداد خياليه
وانت تمشي بسيرلنكا لازم تنتبه من الغربان لان بعضها يجيك من ورى يمشي طبلونه وممكن يضربك انا الحمد لله قرعة خويي فكتني لان الغربان يحبون الراس الاقرع يمكن تبي تعطيه كف حلاقه الله اعلم
منظر رائع لغروب الشمس خلف الاشجار
لاتدققون منتم شايفين شي
مع غروب الشمس رجعنا للفندق وجلسنا بالكوفي شوب وبما انك في بلد الشاي لاتستغرب تشوف انواع كثيره من الشاي
جميع انواع الشاي موجوده
بعدها رجعنا لغرفتنا وبدلنا ملابسنا لان بعض الفنادق مايسمحون لك تدخل المطاعم بشورت دخلنا المطعم وكان عباره عن بوفيه مفتوح واكلهم لذيذ ومايحتاج تطلب اكل سبايسي لان حتى الحلى فيه فلفل الصراحه كانت الحلويات عندهم لذيذه وتشتهر كاندي بالحلويات
صادف وجودنا بالفندق على مدى يوم وليله 3 حفلات زواج طبعا كانت فرصه لي اتفرج واشوف كيف اعراسهم بس انا طمعت شوي لاني كلمت العريس وقلت له ابي احضر واصور وابي معلومات عن عاداتكم وتقاليدكم وكنت حاط في بالي ان نسبة طردي تسعين بالميه لكني تفاجأة برده قال ابشرررر ومسك يدي ودخلنا الحفل طبعا الحفل مابدا وقال تعال اوريك
كانت قاعة الاحتفال مقابل المطعم والمطعم طبعا مكشوف والناس تتفرج من بعيد وشافوني وانا اكلمهم وادخل معهم استغربوا وش عنده ذا لايكون خواله سيرلنكيين
بعد الزفه يجلس يوقف العريس وعروسته ويهنونهم اهلهم واصدقائهم ويلتقطون الصور التذكاريه
بعد كتابة العقد يجون هنا المعاريس ويقطعون الكيكه طبعا بيجون ويلقون طرف الكيكه ماكول مايضر قطعه صغيره ماهي مخربه العرس
بعد كذا يبدون بالعشاء او الغدا وعباره عن بوفيه مفتوح وعلى يختلف من عايله لعايله على حسب حالتهم الماديه
طبعا الزفه لازم يكون فيها فرقه من رقاصين ومطبلين يمشون قدام المعاريس واهلهم من بوابة الفندق الى صالة الحفل
اعضاء الفرقه على هاللبس تقول سيارة باكستاني مزبرقها
طبعا العريس اللي جلست معه كن السالفه جازت له جلست انا واياه وطنش العروس واهلها شكلها طايحه بتسبده قعدنا بالصاله وصار يشرح لي مراسم العرس كامله
[size=16]وحنا نسولف جا واحد للعريس وعطاه سيف قلت بسسسس الرجال استدرجني بالصاله عشان يذبحني قربان للالهه حقتهم شاف وجهي تغير يوم جابوا السيف وقعد يضحك
good man المشرف العام
عدد الرسائل : 303 العمر : 48 المزاج : حسب الجو تاريخ التسجيل : 18/08/2007
موضوع: رد: رحلة الى سيرالانكا السبت نوفمبر 03, 2007 12:55 am
قلت له دام انت ملزم على الاقل سن السيف لاتعذبني والكبد عطوها خويي ترى يموت بالكبده ووزعوا لحمي على الفقراء والسواق حقنا لايذوق مني شي مايستاهل[/size]
قال لاتخاف اقولك وش سالفة السيف الحين
طقوس الزواج تقام في بيت العروس ولكن الاغنياء استبدلوا بيت العروس بالفنادق الفخمه وتبدأ طقوس الزواج بحضور اهل العروسين الى المكان ثم يقوم اقرباء الزوجه او احد اخوتها بغسل رجل الزوج في اناء مذهب دلاله على قبوله بعائلة الزوجه ثم يدخل اهل العروسين وبرفقتهم العريس فقط بالدخول الى مكان الحفل واماهم الفرق الاستعراضيه والطبول والمزامير وتكون العروس مخفيه خلف ستاره وحولها ورود جوز الهند والفوانيس >>>تقول دعاية جبنة بوك تزين العروس من قبل قريباتها وامها بالذهب والذي يتكون من سبع سلاسل من الذهب والاقراط وغطاء الرئس الابيض المطرز بالذهب
ثم تزف العروس للفندق او مكان الحفل قبل العريس حيث يوضع قماش ابيض لكي تمشي عليه وامامها الفرقه التي تغني اغاني الفرح والمباركه للزوجين وبعد الجلوس يحضرون ثمرة جوز الهند وتضرب بالسيف ضربه واحده قلت ايه اشوا الله يبشرك بالخير الاب او الخال هو من يقوم بالعمليه حيث تنقسم الى قسمين ثم ترش بالماء وبعدها يذهب الزوج والزوجه الى طاوله عقد القران وهناك يتم الزواج رسمي وذلك بحضور الشهود وبعدها يقومون بقطع كيكة الزواج بغيت اقول ايه كيكة الزواج اعرفها خخخخخ>>>اكل نصها وبعد مراسم الزواج يذهب العريس والعروس الى منزل العريس ولكن الان يذهبون الى شهر العسل واذا عادوا يقوم اقربائهم بزيارتهم وتقديم الهدايا والتي تتكون من المواد الغذائيه واهمها الموز>>>وش دعوه قرود والله اني بغيت اقول شف لي اخت مرتك بس عشان اخلي اخونها يغسلون رجلي ويهمزونها
جلسنا شوي وبدت طقوس الزواج والناس تقول خير وش عنده هذا جاي معنا وانا اقولهم انا صديق العريس
هنا زفة العرس بس اشوف كلهم رجال قلت ياولد لايكون هذا عرس شواذ بس
وهذي لقطة فيديو للزفه
وهذي الفرقه واللي على اليمين كنه سندباد استنزل علينا اثره مايتحمل السامري حقهم المسكين واللي على اليسار لابس لبس كنه ثوب هذا الشيخ شرندي اللي يكتب لهم العقد
ياخوفي ان هاللي قاعد اصوره الجزار حق الذبايح وانا احسبه العريس طبعا هذا الزي الرسمي للزوج
هذا الزواج الثاني كان في قاعه مقابله بس شكله عرس شيوخ طبعا كل اللي يتزوجون بالفنادق هم الطبقه المخمليه وعيال الشيوخ
وهذي كيكتهم الله ستر عليها>>> شبعان بالعرس الاول
هذا واحد من الورعان اللي يمشون مع العريس
حظرت بنفس الليله زواجين وكانوا موظفين الفندق يشوفوني وانا احضر الزواجين كلهم وانا طالع من عندهم قالي واحد ترى بكره الصبح فيه عرس بعد
رجعت للغرفه وقلت لخووي بكره قومني بدري معزوم على عرس وفعلا بعد ما افطرنا الصبح كان المفروض اننا نغادر الفندق لكن بعد ماطلعت من المطعم صادفت العرس وكنت انا فوق بالدور الثاني
طبعا قعدت اصارخ عليهم يوقفون لين اجي وهم مايدرون وش السالفه وقفوا خخخخخخخخ
وهنا نزلت لهم وقلت يالله وهم يتلفتون ببعض وفيهم ضحكه
لقطة فيديو للعرس الثالث
طبعا اللي يشرف على ترتيبات الحفل محلات متخصصه والفندق ماله دخل بالعرس هذا ماشفت العروسه وقلت يمكن ماتجي الفندق وانا راجع لغرفتي باخذ شنطتي صادفت العروسه ومعها هالمزايين
لقيت العروسه هنا ووقفتها على الدرج وهات ياتصوير هههههههه الظاهر تحسبني المصور اللي متفقين معه
جيت عند العريس وقلت له كم دفعت مهر قال حوالي 7 الاف دولار قلت هذي 8 الاف وعطني ملابسك واكمل العرس عنك قال هاه بغى يوافق ههههههههه
عادات السيرلنكيين معقده ومنها على سبيل المثال يتفائلون بحمل العروس بشهر ابريل وتقام احتفالات اذا حملت بهذا الشهر من احتفالات اهل كاندي هو احتفالهم بالقمر في شهر اغسطس ويسمى اسالا بيراهيرا حيث تقام الاحتفالات لمدة عشرة ايام ويشارك في الاحتفالات الفرق الشعبيه والفيله ويلبس خلالها ملابس خاصه وهي طقوس دينيه
غادرنا الفندق وكانت الساعه حوالي 10 صباح وكانت وجهتنا مدينة نوراليا
ورد في احد نوافير الفندق
اعجبتني هالحركه
بحيرة في وسط مدينة كاندي
كان فيه قصور كثيره حول البحيره
طبعا من اهم الاشياء عندي اني اخذ تذكار من اي مكان ازوره وطلبت من السواق يودينا محل تحف وهدايا تذكاريه
صورة التمثال لانه يشبه واحد من الشباب بس
غادرنا مدينة كاندي حوالي الساعه الحاديه عشر صباح يوم الخميس متجهين الى مدينة نوراليا والمزيد من الاثاره والمغامرات
بعد العيد ان شاء الله الجزء الرابع وهو مخصص لمدينة نوراليا وكل عاااااام وانتم بخير
الغريب مبدع متآلق
عدد الرسائل : 123 العمر : 52 المزاج : رايق تاريخ التسجيل : 31/08/2007
موضوع: رد: رحلة الى سيرالانكا الأحد نوفمبر 04, 2007 3:44 am
الجزء الاول :رحلتي الى سيقيريا Sigiriya هذا الجزء الثاني ومخصص لمنطقة دمبولا في سيرلنكا طبعا غادرنا فندق امايا ليك في سيقريا وكانت وجهتنا مدينة كاندي ولكن مرورنا بمنطقة دمبولا كان لازم نوقف بالمنطقه هذي مو عشانها حلوه لان فيها رحلات السفاري على ظهور الفيله وزيارة مزارع التوابل والمواقع السياحيه والمصانع
كا ماتبعد عن العاصمه تقل الزحمه وعموما منطقة سيقريا لايوجد بها زحام ولاحظنا خلو الطرق بعد غياب الشمس
اول شي رحنا له في دمبولا هو مصنع الاقمشه وكان جميع العاملات بالمصنع بنات
محل عرض منتجات المصنع عند دخولنا المصنع كانت هالمزيونه تشرح لنا الصراحه ان نسبة الجمال في سيرلنكا عموما تحت الصفر
هذي طريقة الرسم وخطواتها المتعدده والتي تبدا بقلم رصاص
وهذي اخر الخطوات وهي تثبيت الالوان لاحظنا اكثر من مره ان الناس يستخدمون الحطب وعند سؤالنا السائق اخبرنا بأن الحطب متوفر في كل مكان والغاز والكهرب لايقدر على تكاليفه معظم السيرلنكيين
ابتسامه سيلانيه من الاذن للاذن طبعا مع حركة اليد يقولون لك ايبوان وانت ترد نفس الشي وراح تسمع هالكلمه بكل مكان بالطائره بالمطار بالمطاعم بالفندق لازم تعرفها لانهم يتشققون اذا قلتها لهم هناك تعلمت كلمتين بس ايبوان تعني مرحبا وكلمة استوتي وتعني شكرا خويي ابتلش بهالكمه عجز يجيبها صح كل شوي جايب كلمه من راسه وتطلع سبه يالله نفكه منهم كان مقابل المصنع مدرسه والظاهر كانوا بوقت البريك وطبعا ماهم زينا يلعبون كوره عندهم لعبتهم المفضله
اللعبه المفضله في سيرلنكا هي الكريكت مثلها مثل الهند وباكستان
هذي تحيه لكم من هالورع السيلاني
واصلنا طريقنا للبحث عن رحلات السفاري وصلنا لرحلات السفاري وكان برنامجهم رحله على ظهور الفيله ويعبرون النهر والغابات بس كان الجو حار والشمس حاره اكتفينا بالتصوير وبعدين شبعنا من الفيله بتايلند
الفيله تتسبح حتى شوفوا الفيل الاخير حاط الفوطه على كتفه
شوفوا الفيل الصغير تراه تمردغ بعد هالحركه خخخخخخخ سواقنا بوذي والسياره كلها تماثيل واصنام ولاقدرت اصور من التماثيل قلت له ياخوي شوف لنا صرفه مع ربك حطه بالشنطه والا نزله بالفندق تراك ابلشتنا وبعدين وش هالاسراف 20 رب عندك وافق انه يحطهم بالشنطه قال بس الصوره هذي لازم تكون على الطبلون قلت ماهي مشكله دام صوره بس يوم فتحت الشباك ابي اصور طار ربه والرجال زعل ووقف بنص الطريق يجيبه قلت له وش فيك خايف عليه خله يفزع لنفسه اذا يقدر واصلنا طريقنا وكانت وجهتنا مزارع التوابل
الغريب مبدع متآلق
عدد الرسائل : 123 العمر : 52 المزاج : رايق تاريخ التسجيل : 31/08/2007
موضوع: رد: رحلة الى سيرالانكا الأحد نوفمبر 04, 2007 3:55 am
اعجبني الطريق والاشجار تغطيه
الكل يمشي على الطريق السيارات والناس والحيوانات
هذي سيارتنا وهذا سواقنا تراه ابلشني يقول حط صورتي بالنت وترى رقم السياره للبيع وصلنا بعد ساعه ونص لمزارع التوابل دخل معنا مرشد سياحي وقعد يشرح لنا عن الاشجار
اول الاشجار كانت شجرة الهيل
وهذي شجرة الهيل
الفلفل الاسود
شجرة الفلفل الاسود
شجرة القهوه
شجرة المطاط
القرنفل
شجرة القرنفل
جانب من المزرعه
القرفه
شجرة القرفه
شجرة الفنيلا واللي بالقاروره عصارة الفانيلا
الاناناس الصالح للاكل
والانواع الباقيه تستعمل للعلاج
الفاكهه هذي تسمى جاك فروت الظاهر مسمينها باسم اللي اكتشفها ومن الاسم شكله اوروبي
الزنجبيل
شجرة الزنجبيل
الكركم
شجرة الكركم
واذا جيت تطلع تمر على هالمحل اللي يبيع منتجاتهم لكن اسعارهم خياليه طبعا سواقنا زيه زي كل الشيبان يمشي 40كم وطفشنا قلت له ابي اسوق وعيا قال سيارة الشركه قلت له يارجال انت غشيم اصلا وتقول هالعذر اصلا انت خواف والظاهر ضربت على وتر حساس شوفوا وش سوى بعدها خخخخخخخخخخخخ
الغريب مبدع متآلق
عدد الرسائل : 123 العمر : 52 المزاج : رايق تاريخ التسجيل : 31/08/2007
موضوع: رد: رحلة الى سيرالانكا الأحد نوفمبر 04, 2007 3:57 am
اضغط على الصورة لمشاهدة الفيديو
شوفوا كيف يسوق بعد ماجاته ام السيرلنكيين
بعد مطاره لهالسنجاب مسكته بنت وقلنا نصوره لكم السنجاب جربوع مطور
واصلنا رحلتنا بهالمناظر الجميله وصلنا اكبر معبد في سيرلنكا
مادخلنا داخل المعبد واكتفينا بتصويره من الخارج ويرتفع التمثال حوالي 15 متر ربهم متربع فوق هالبيت ويقصص اظافره
Admin مدير
عدد الرسائل : 650 العمر : 46 الموقع : https://nrjsia.yoo7.com المزاج : رايق تاريخ التسجيل : 18/08/2007
موضوع: رد: رحلة الى سيرالانكا الإثنين ديسمبر 03, 2007 10:22 am
هذي اخر رحله في سيرلانكا طبعا الرحله مخصصه للعاصمه كولومبو في الحقيقه ان العاصمه لاتستحق الزياره وقد كان مخططنا عند وصولنا لسيرلانكا البدء من منطقة سيقيريا صائبا وبما ان مغادرة سيرلانكا لابد ان تكون من العاصمه كولومبو لذا يجب عليك العوده لها ولا مانع من التوقف يوم واحد فقط لاكتشاف كولومبو وزيارة مايستحق الزياره
<hr width=500 color=#808080 SIZE=1>
كانت رحلتنا اللي فاتت لنوراليا غادرنا فندق جراند بعد الفطور لان السواق ابلشنا يقول لازم نمشي بدري لان الجو مطر والطريق زحمه وطويل بس الظاهر انه نصاب لانه كان يوم جمعه ويبي يروح لاهله مدري وش مستعجل عليه كان الجو مطر والجو باااااارد
طبعا فيه طريقين لكولومبو اما تسافر عن طريق كاندي وهذا الطريق اللي جينا معه قبل 5 ايام
او طريق هاتون وهو اجمل بس متعب لانه ضيق وزحمه
لقطة للطريق وواضح تعرج الطريق
طريق هاتون روعه بس ضيق يعني بعض المرات اذا شفت قدامك تريله تجيك ام الركب ام الركب = قمة الخوف يعني ركبك تصافق ببعض ماتقدر توقف هذا والله اعلم مثلا هالنفق اللي بالصوره تتوقعون بنجي مسرعين وندخله ماااااااااافيه امل قلنا له وقف نروح نشوف فيه سيارات ولا لا اجل تبونا ندخل تحت باص والا قطار والا اقل شي تصدم لك بقره عاد من يفكك من الهندوس داعس رابهم مايكفي العجوز اللي بغت تموت في نوراليا
مشينا وكانت سرعتنا ماتتعدى 40 كم عادي انزل والسياره تمشي واصور وارجع اركب
لكن بعض المرات تتفاجأ بحادث قدامك مثل ابو الشباب اللي كان يقرا رساله بالجوال وطلع من الطريق
كانت الشاحنه مسكره الطريق ونزلنا طبعا مافيه امل نفزع بس عشان نصور
لكن راعي الشاحنه يحسبنا نبي نساعد جا يركض ومع حبل قلت خير ياخوي سيارتنا كورلا بس الرجال كان مصر اننا نساعده ويمد لنا الحبل بغينا نربطه بحبله ونمشي مااايفهم
واصلنا رحلتنا لين وصلنا هالديره جلسنا فيها اكثر من ساعه بسبب راعي الباص موقف وسط الطريق وطالب شكشوكه من الكافتيريا وعااااادي عنده حنا طفشنا وقلت بنزل اشوف وش السالفه قال السواق اجلس ترى الدعوى عادي ماهي اول مره تصير قلت يعني مستانس انت لنا اكثر من ساعه واقفين قعد يضحك السواق قلت خيييييير قال مره جلست بالشارع 3 شهور >>>قويه صح
الصراحه كان الطريق روعه جبال وانهار وغابات بس طويل الطريق
باص مدرسات سيرلانكيات متعينات بعيد
واصلنا رحلتنا لين وصلنا شارع كله زينات ولافتات وقطع قماش لونها ابيض قلت للسواق نزلنا هنا الظاهر انه عرس>>>جازت له عروسهم
good man المشرف العام
عدد الرسائل : 303 العمر : 48 المزاج : حسب الجو تاريخ التسجيل : 18/08/2007
موضوع: رد: رحلة الى سيرالانكا السبت ديسمبر 15, 2007 7:26 am
دولة طبيعة استوائية خلابة جداًواتمنى زيارتها يوما ما
موضوع: رحلة الى سيرالانكا 
الأربعاء أكتوبر 31, 2007 12:39 am
[/size]
